Ras Glyndŵr - Rhedeg dros y Gymraeg!

Ras Glyndŵr - beth yw e?

 

Ras relay di-stop dros yr iaith Gymraeg o Senedd-dy Glyndŵr ym Machynlleth i Aberteifi a gynhelir ar ddydd Sadwrn 15 Medi 2013 yw Ras Glyndŵr.

 

Bydd unigolion, teuluoedd, busnesau neu glybiau lleol, sefydliadau ac ysgolion yn talu £50 i noddi i redeg 1km. Gall holl ddisgyblion yr ysgol neu holl aelodau’r tîm pêl-droed y pentref redeg yr 1km yna. Ein bwriad yw gweld miloedd o bobl yn rhedeg y ras yn ystod y dydd.

 

Bydd baton wedi ei cherfio’n arbennig i’r ras yn cael ei throsglwyddo o law i law wrth i redwyr dangos eu cefnogaeth i’r iaith. Nid ras i athletwyr yw hi ond ras dros yr Iaith Gymraeg gan bobl Cymru. Ei phwrpas yw codi arian i fentrau Cymraeg, codi ymwybyddiaeth o’r iaith, dangos i’r byd fod cefnogaeth i’r Gymraeg ar lawr gwlad a thynnu pobl at ei gilydd - Cymry Cymraeg, di-Gymraeg a dysgwyr; Gwlad a Thref a phob dosbarth, gallu a hil.

 

Mae’n Ras uchelgeisiol. Mae wedi ei seilio ar ras y Korrika a ddechreuodd yng Ngwlad y Basg yn 1980 ac sydd bellach yn denu tua 600,000 o redwyr a threfnwyr. Mae ras debyg yn Llydaw (ân Redadeg) a nawr yr Iwerddon (ân Rith). Cymru fydd nesa gyda Ceredigion yn arwain y ffordd gyda’r bwriad fod y Ras yn tyfu i fod yn un cenedlaethol.

 

 

Buddion y Ras

 

Mae sawl budd arall i’r ras:

 

Codi arian: Buddsoddi’r elw o’r ras nôl i fudiadau er mwyn hyrwyddo’r defnydd o’r Gymraeg.

 

Hybu’r iaith Gymraeg: Tynnu siaradwyr Cymraeg, Cymry Cymraeg nad sy’n arferol rhan o’r ‘Pethe’, pobl di-Gymraeg  a dysgwyr at ei gilydd.

 

Hybu Mudiadau Cymraeg: Gyfle i gryfhau strwythur mudiadau drwy godi proffil ac arian mewn digwyddiadau ar hyd y daith. Uno Cymru a'r Gymraeg: Bydd y ras yn cysylltu ardaloedd Cymraeg a di-Gymraeg eu hiaith, trefol a gwledig, breintiedig a difreintiedig gan ddangos amrywiaeth dosbarth a chefndir siaradwyr Cymraeg.

 

Codi Proffil y Gymraeg: Bydd yn denu sylw yn y cyfryngau Cymraeg a Chymreig yn genedlaethol a lleol a chynyddu'r defnydd o'r Gymraeg ar y we (clipiau ar y BBC, S4/Clic, YouTube ayyb). Bydd y ras yn ffordd weledol a symbolaidd o ddangos fod y Gymraeg yn iaith ag iddi filoedd o gefnogwyr.

 

Codi Proffil cymunedau:  Tynnu sylw at fudiadau a sefydliadau cymunedol a chryfder cymunedau ar hyd y daith

 

Hybu iechyd corfforol: Bydd yn hyrwyddo iechyd corfforol trwy gyfrwng y Gymraeg ac yn ffordd o Gymreigio clybiau athletau a chlybiau chwaraeon eraill sy'n cymryd rhan.

 

Pwy sy’n cefnogi?

 

Mae Cered Menter Iaith Ceredigion yn brif-bartner, yn trefnu a chydlynu’r ras yn y Sir. Mae Mudiadau Dathlu’r Gymraeg a chyngor cenedlaethol Mentrau Iaith Cymru hefyd yn cefnogi’r Ras.

 

Mae cwmni nid-er-elw, Rhedadeg Cyf, eisoes wedi ei sefydlu a thrwyddi hi bydd arian a cheisiadau grantiau’n cael eu gweinyddu. Bydd mentrau a sector gwirfoddol Ceredigion a Bro Ddyfi yn ymgymryd yn y gwaith o gydlynu a threfnu’r ras gan weithio gyda phwyllgorau bro lleol i stiwardio a threfnu rhedwyr yn eu hardal hwy. Bydd cannoedd o bobl yn gweithio o’u gwirfodd dros y Ras a thros yr iaith Gymraeg.

 

Ariennir y ras gan yr arian a godir gan bobl i redeg a gan nawdd gan gwmnïau a sefydliadau.

Diddordeb?

Cynhelir cyfarfod cychwynnol ‘Ras Glyndŵr 2013’ ar 15 Tachwedd 2012, yn Theatr Felin-fach, rhwng 2 a 4 y prynhawn.

 

Yn ystod y cyfarfod bydd cyfle i ddysgu mwy am y ras, trafod y manylion, codi cwestiynau, a chytuno ar y ffordd ymlaen.

Cysylltwch â Gwenno Hywel neu Siôn Jobbins am fwy o fanylion.

Rhif ffôn:  01545 572356

e-bost: Gwenno.Hywel@ceredigion.gov.uk